द पॅसेंजर

ही मी वाचलेली डॅनियल हर्स्टची पहिलीच कादंबरी आहे, आणि मला ही कथा खूप रोचक वाटली. लेखकाच्या लेखनशैलीने आणि प्रत्येक लहानसहान तपशील मांडण्याच्या कौशल्याने मी प्रभावित झालो. ही कथा फक्त काही तासांत घडते, आणि चारही पात्रांच्या दृष्टिकोनातून आळीपाळीने कथन केली जाते. सुरुवातीपासून शेवटपर्यंत कथा तुम्हाला खिळवून ठेवते, आणि एकही कंटाळवाणा क्षण येत नाही. भाषा अतिशय साधी आणि सोपी आहे.

कथासारांश:
एमंडा, जी एक सिंगल पॅरेंट आहे आणि तिचे तिच्या मुलीसोबत नाते तणावपूर्ण आहे, ती लंडनहून ब्राइटनला घरी (फ्लॅटमध्ये) परत येताना ट्रेनमध्ये एका अनोळख्या सहप्रवाशाला भेटते. तो तिला तिच्या फ्लॅटमधील सेफचा कोड विचारतो. आणि तो एवढ्यावरच थांबत नाही—त्याला माहीत असते की त्या सेफमध्ये काही कमी नव्हे, तर तब्बल २०,००० पाउंड्स आहेत!

दरम्यान, एमंडाची मुलगी लुईस तिच्या जेम्स नावाच्या प्रियकरासोबत त्या फ्लॅटमध्येच आहे, पण एमंडाला याची कल्पनाही नाही. आणि धक्कादायक गोष्ट म्हणजे, जेम्स हा त्या अनोळख्या माणसाचा साथीदार आहे! पण लुईसला हे ठाऊक नाही!

आता तो अनोळखी प्रवासी एमंडाला सांगतो की जर तिने सेफचा कोड दिला नाही, तर जेम्स लुईसला ठार मारेल. आणि जर तिने कोड दिला, तर जेम्स सेफ उघडेल, पैसे घेऊन निघून जाईल आणि लुईसला काहीही होणार नाही.

जेम्स आणि तो अनोळखी प्रवासी एकमेकांच्या संपर्कात मोबाइल फोनद्वारे आहेत.

आता अनेक प्रश्न निर्माण होतात:

• त्या अनोळख्या माणसाला एमंडाच्या सेफबद्दल आणि त्यातील पैशांबद्दल कसे कळले?
• एमंडाने काय करायला हवे?
• ती कोड देते का?
• लुईसचे पुढे काय होते?
• त्या सेफमध्ये केवळ पैसेच आहेत की आणखी काही रहस्य आहे?
• एमंडाचा भूतकाळ काय आहे?
• ती पैसे बँकेत का ठेवत नाही?
• एमंडा आणि लुईसच्या नात्यात तणाव का आहे?

या सर्व प्रश्नांची उत्तरे मिळत असताना, अचानक कथानक वेगळीच कलाटणी घेते आणि परिस्थिती उलथापालथ होते आणि मग कोणीतरी "प्रवासी" बनतो, पण कुणासाठी?

कथेचा शेवट खूपच अप्रतिम आहे. थ्रिलर प्रेमींसाठी हा एक नक्की वाचावा असा पुस्तक आहे!